ယူနိုက်တက် ပရိသတ်များ၏ အားပေးမှုအတွက် ကျေးဇူးတင်ကြောင်း မာတာပြောကြား
မန်ချက်စတာ ယူနိုက်တက် ပရိသတ်များ၏ ချစ်ခင်အားပေးမှုအတွက် ကျေးဇူးတင် ဝမ်းမြောက်မိကြောင်း ဟွမ်မာတာက ထုတ်ဖော် ပြောကြားလိုက်သည်။
ပုံမှန်အားဖြင့် ယူနိုက်တက်တွင် အရန်လူအဖြစ်သာ ပါဝင်ရလေ့ရှိသည့် စပိန်လက်ရွေးစင် ကွင်းလယ်လူသည် တော့တင်ဟမ် ဟော့စပါးကို အနိုင်ရသည့် ပွဲစဉ်တွင် ပွဲထွက်လာခဲ့သလို အကောင်းဆုံး ခြေစွမ်း ပြသသွားခဲ့သည်။ ယူနိုက်တက်သည် အိုးလ်ထရက်ဖို့ဒ်တွင် စပါးကို (၃-၀)ဖြင့် သက်တောင့်သက်သာ အနိုင်ရခဲ့သလို ယခုရာသီ အကောင်းဆုံး စွမ်းဆောင်ရည်မျိုးဖြင့် ကစားနိုင်ခဲ့ကြောင်း ပရိသတ်များနှင့် ဘောလုံး ဝေဖန်ရေးသမားများ၏ ချီးကျူးမှုကို ခံခဲ့ရသည်။
အိန်ဂျယ်လ် ဒီမာရီယာ ပွဲပယ်ခံထားရချိန်တွင် မာတာသည် (၂)လအတွင်း ပထမဆုံးအကြိမ်အဖြစ် အသင်းအတွက် ပွဲထွက်ခွင့် ရခဲ့ခြင်းဖြစ်ပြီး တိုက်စစ်ပိုင်းကို အကောင်းဆုံး ပံ့ပိုးသွားခဲ့သည်။ ၎င်းက “စပါးကို နိုင်လိုက်တာဟာ ထိပ်ဆုံးလေးသင်း စာရင်းမှာ ပါဝင်ရေးအတွက် သိပ်အရေးပါတဲ့ ရလဒ်ပါပဲ။ စပါးကလည်း ကျွန်တော်တို့နဲ့ ရည်မှန်းချက် တူတူညီညီ ပြိုင်ဆိုင်နေတဲ့ အသင်းမျိုး ဖြစ်ပါတယ်”ဟု ပြောကြားခဲ့သည်။ ၎င်းက “FAဖလားမှာ စိတ်ပျက်စရာတွေ ကြုံပြီး ထွက်ခွာခဲ့ရတဲ့နောက် ပရိသတ်တွေအတွက် အခုလို နိုင်ပွဲမျိုး ယူဆောင်ပေးနိုင်တာ အရမ်းပျော်ပါတယ်။ အရှုံးရလဒ်ကနေ ရုန်းထဖို့ အကောင်းဆုံး နည်းလမ်းကတော့ ကစားပုံ ကောင်းကောင်းနဲ့ ပရိသတ်တွေ ပျော်ရွှင်စေပြီး နိုင်ပွဲရယူတာပဲ ဖြစ်ပါလိမ့်မယ်”ဟုလည်း မှတ်ချက်ပြုခဲ့သည်။
မာတာက “တစ်ဦးချင်း အမြင်အရ ပြောရရင် ကွင်းထဲမှာ ကျွန်တော် သက်တောင့်သက်သာ ကစားနိုင်ခဲ့ပြီး အသင်းဖော်တွေနဲ့ နောက်တစ်ခါ အတွဲအဖက်မိမိ ကစားလာနိုင်ပါပြီ။ ပရိသတ်တွေဆီက လက်ခုပ်သံတွေကို ကြားခဲ့ရပြီး ဒီအတွက်လည်း သူတို့ကို ကျေးဇူးတင်ရပါမယ်။ ယူနိုက်တက် ကစားသမား တစ်ယောက်အဖြစ် ပထမဆုံး ကျွန်တော် စကစားကတည်းက အိုးလ်ထရက်ဖို့ဒ်ရဲ့ မေတ္တာဓာတ်ကို ခံစားမိခဲ့ပါတယ်။ ပရိသတ်ရဲ့ ချစ်ခင်မှုကို ခံရခြင်းဟာ ပွဲကစားချိန်မှာ သိပ်ကို အရေးကြီးတယ်ဆိုတာ သိစေချင်ပါတယ်။ ပရိသတ်က ကျွန်တော် လူစားလဲ ထွက်ခွာပြီး အဝတ်လဲခန်းထဲ ဝင်သွားချိန်မှာ လက်ခုပ်တီး အားပေးကြပါတယ်။ ဒီအတွေ့အကြုံမျိုးကို ဘယ်တော့မှ ကျွန်တော်မေ့မှာ မဟုတ်ဘူး။ ဒီအတွက် ပရိသတ်တွေကိုလည်း အရမ်းကျေးဇူးတင်မိပါတယ်”ဟုလည်း ပြောကြားသွားသည်။
Soccer Myanmar
No comments:
Post a Comment