မန်စီးတီးတွင်ပင် ပျော်ရွှင်နေကြောင်း ရီးယဲလ်ပစ်မှတ် အဂူရို အခိုင်အမာဆို
ရီးယဲလ်မက်ဒရစ် အသင်းက ခေါ်ယူရန် စိတ်ဝင်စားနေကြောင်း သတင်းများ ထွက်ပေါ်လာသည့်တိုင် ၎င်းအနေဖြင့် လက်ရှိကလပ် မန်ချက်စတာ စီးတီးတွင်သာ ပျော်ရွှင်နေကြောင်း ဆာဂျီယို အဂူရိုက ဖွင့်ဟ ပြောကြားလိုက်သည်။
အသက်(၂၇)နှစ်ရှိ အာဂျင်တီးနား လက်ရွေးစင်သည် ရီးယဲလ်၏ ကာလရှည်ကြာ ပစ်မှတ် ဖြစ်ခဲ့သည်။ ရီးယဲလ် နည်းပြသစ် ရာဖာဘင်နီတက်ဇ်သည် တိုက်စစ်ပိုင်းကို မွမ်းမံပြင်ဆင်ရန် လိုလားနေပြီး အဂူရိုကို နှစ်သက်နေကြောင်း သတင်းများက ဖော်ပြခဲ့သည်။ မန်စီးတီးသည် ဩဂုတ်လ အတွင်းက အဂူရိုကို (၅)နှစ် သက်တမ်းတိုး စာချုပ်ထားပြီး အသင်းတွင် ကာလရှည်ကြာ ဆက်လက် ထိန်းသိမ်းထားနိုင်ရန် ပြင်ဆင်ထားသည်။ အဂူရို ကိုယ်တိုင်ကလည်း ၎င်းသည် အစ်တီဟတ်၌ ပျော်ရွှင်နေဆဲဟု ဆိုသည်။
အဂူရိုက “ကလပ်အသင်း တစ်ခုကနေ ကစားသမားတစ်ယောက် ထွက်ခွာချင်ပြီဆိုရင် တစ်ခုတည်းသော ရည်မှန်းချက်က အောင်မြင်မှုတွေ ရှာဖွေဖို့ပဲ ဖြစ်လိမ့်မယ်။ မန်စီးတီးမှာတော့ ကျွန်တော် လိုလားသမျှ အောင်မြင်မှုတွေ ရှိနေပြီလေ”ဟု ပြောကြားခဲ့သည်။ ၎င်းက “ကောလာဟလတွေကို ကျွန်တော်ကတော့ မရပ်တန့်နိုင်ဘူး။ လူတွေ ဘယ်လို တွေးတောနေတယ် ဆိုတာကို ကျွန်တော်လိုက်ပြီး မစွက်ဖက်နိုင်ဘူး။ ကျွန်တော် လုပ်နိုင်တာက ပြောဖူးတာကို ထပ်ထပ်ပြောနေဖို့ပဲ။ ကျွန်တော် မန်စီးတီးမှာ တကယ့်ကို ပျော်ရွှင်နေပါတယ်”ဟုလည်း ဖြေရှင်းသွားခဲ့သည်။
Soccer Myanmar
No comments:
Post a Comment