ဒန်နီအဲလ်ဗက်စ် ဘာစီလိုနာတွင် ဆက်ရှိ၊ မရှိ မသိရှိကြောင်း ဘာတိုမြူ ပြောကြား
လာမည့် ဘောလုံးရာသီတွင် နူးကမ့်၌ ဒန်နီအဲလ်ဗက်စ် ဆက်ရှိ၊ မရှိကို မိမိမသိရှိကြောင်း ဘာစီလိုနာ ဥက္ကဋ္ဌ ဂျိုးဇက် မာရီယာ ဘာတိုမြူက ဝန်ခံပြောကြားလိုက်သည်။
ဘရာဇီးလ် နောက်ခံ ကစားသမား၏ စာချုပ်သည် ယခုနှစ် နွေရာသီတွင် ကုန်ဆုံးမည် ဖြစ်ပြီး ကစားသမား အနေဖြင့် ဘာစီလိုနာတွင် ဆက်ကစားရန် ဆန္ဒရှိသော်လည်း အသင်းမှ စာချုပ်သစ်အတွက် ကမ်းလှမ်းခြင်း မရှိသေးကြောင်း အေးဂျင့်ဖြစ်သူ ဒီနိုရာဆန်တာ အန်နာက ဖေဖော်ဝါရီ ၂၀ ရက်တွင် ပြောကြားခဲ့သည်။
ထို့နောက် ဘာတိုမြူက အသင်းအနေဖြင့် ၂၀၁၆ ခုနှစ်အထိ ကစားသမား အပြောင်းအရွှေ့တွင် ပါဝင်နိုင်မည် မဟုတ်ကြောင်းနှင့် အဲလ်ဗက်စ်ကို စာချုပ်သစ်ချုပ်ဆိုဖွယ်ရှိကြောင်း အရိပ်အမြွက်ဆိုခဲ့သည်။
“လာမယ့်နှစ်အတွက် ကျွန်တော်တို့ ပြင်ဆင်နေပါတယ်။ ရီဇက်ခ်ျ၊ ဘရိုင်ဒါနဲ့ အခြား ဒါရိုက်တာတွေကလည်း ဒီအတွက် လုပ်ဆောင်နေပါတယ်။ အဲလ်ဗက်စ် အသင်းမှာ ဆက်နေ၊ မနေတဲ့အပေါ် ကျွန်တော် မသိသေးပါဘူး။ ဒါပေမဲ့ ကျွန်တော်တို့က ၂၀၁၆ ဇန်နဝါရီ ၁ ရက်အထိ ကစားသမားသစ်တွေ ခေါ်လို့ရမှာ မဟုတ်ပါဘူး” ဟု ဘာတိုမြူက ပြောကြားခဲ့သည်။
ဒန်နီအဲလ်ဗက်စ်သည် ၂၀၀၈ ခုနှစ်တွင် ဆီဗီလာမှ ဘာစီလိုနာသို့ ပြောင်းရွှေ့ခဲ့ပြီးနောက် နည်းပြဟောင်း ပပ်ဂွာဒီယိုလာ လက်အောက်တွင် အရေးပါသည့် ကစားသမား တစ်ဦးအနေဖြင့် ပါဝင်ခဲ့သည်။
Soccer Myanmar
0 comments:
Post a Comment