အာဆင်နယ်ထက် မိုနာကိုက နိုင်ပွဲဆာလောင်မှု ပိုပြင်းပြခဲ့ဟု ဘာဘာတော့ဗ် မှတ်ချက်ပြု
အမ်းမရိတ်စ်တွင် မိုနာကိုသည် အာဆင်နယ်ထက် ပွဲကို ဆာဆာလောင်လောင် ကစားသွားခဲ့ကြောင်း တိုက်စစ်မှူး ဒီမစ်တာ ဘာဘာတော့ဗ်က မှတ်ချက်ပြု ပြောကြားသွားခဲ့သည်။
ဘူလ်ဂေးရီးယား ဝါရင့်တိုက်စစ်မှူးသည် ပြင်သစ်ကလပ်က အိမ်ရှင်အပေါ် (၃-၁)ဖြင့် အနိုင်ရခဲ့သည့် အောင်ပွဲတွင် ဒုတိယဂိုးကို သွင်းယူပေးခဲ့သည်။ မန်ချက်စတာယူနိုက်တက်၊ တော့တင်ဟမ်ဟော့စပါး၊ ဖူလ်ဟမ်တို့နှင့်အတူ ပရီးမီးယားလိဂ် အတွေ့အကြုံများစွာ ရှိခဲ့ဖူးသည့် ဘာဘာတော့ဗ်က မြောက်လန်ဒန် နိုင်ပွဲနှင့် ပတ်သက်ပြီး မိမိ၏အသင်း မိုနာကိုသည် အာဆင်နယ်ထက် စိတ်ဓာတ်ပိုင်း ပိုမိုကောင်းမွန်စွာဖြင့် ဆာလောင်မှုအပြည့် အားထုတ်သွားခဲ့ကြောင်း မှတ်ချက်ပြုခဲ့သည်။ အဆိုပါ ရလဒ်ကြောင့် မိုနာကိုသည် ချန်ပီယံလိဂ် ကွာတားဖိုင်နယ် အဆင့်သို့ တက်လှမ်းရန် အလွန်နီးစပ်သွားပြီ ဖြစ်သည်။
ဘာဘာတော့ဗ်က “ဒီရလဒ်မျိုး ဖြစ်လာမယ်လို့ ဘယ်သူမှ ထင်မထားလောက်ဘူး။ ဒါပေမဲ့ ကျွန်တော်တို့က ကိုယ့်အရည်အသွေးအပေါ် ကိုယ်ယုံကြည်ထားပြီးသားပါ။ ဒီနိုင်ပွဲဟာ မိုနာကိုအတွက် အပြည့်အဝ ထိုက်တန်ပါတယ်”ဟု ဆိုသည်။ ၎င်းက “ကျွန်တော်တို့ အနေနဲ့ ရလာတဲ့ အခွင့်အရေးတွေကို ဂိုးရအောင် လက်တွေ့ သွင်းယူနိုင်ခဲ့တယ်။ ဒါဟာ အသင်းအတွက် ခမ်းနားတဲ့ နိုင်ပွဲတစ်ပွဲပဲ။ ဘယ်သူမှ ထင်မထားဘူးလေ။ ဒါပေမဲ့လည်း ပွဲမပြီးသေးပါဘူး။ နောက်တစ်ပွဲ ကစားဖို့ ကျန်နေသေးတယ်။ အာဆင်နယ်ဟာ အန္တရာယ် ပေးနိုင်ဆဲ အသင်းတစ်သင်းပါ”ဟု မှတ်ချက်ပြုခဲ့သည်။
ဘာဘာတော့ဗ်က “အာဆင်နယ်က အသင်းကောင်းပါ။ ဒါပေမဲ့ အနိုင်ရလဒ်ကို ကျွန်တော်တို့က သူတို့ထက် ပိုပြီး ဆာလောင်ခဲ့တယ်။ တစ်ကွင်းလုံး စိတ်ဓာတ်အပြည့် လိုက်ကစားခဲ့ကြပြီး ကိုယ့်ကိုယ်ကိုယ် ပြန်စိန်ခေါ်ထားတဲ့ အရာကို အောင်မြင်အောင် လုပ်ပြခဲ့တယ်။ ဂိုးတွေ သွင်းခဲ့တယ်။ ဘောလုံးရဲ့ အနှစ်ချုပ်က ဂိုးတွေပါပဲ။ ကျွန်တော်တို့ သုံးဂိုးသွင်းပြီး နိုင်ခဲ့တယ်။ အာဆင်နယ်လို အသင်းမျိုးက လျှော့တွက်ခံမယ့် အခြေအနေမှာ မရှိပါဘူး။ ဒါပေမဲ့ သူတို့ ဒီလိုဖြစ်သွားပြီ ဆိုရင်လည်း သူတို့အတွက် တော်တော်လေး အခြေအနေ ဆိုးတယ်လေ။ အခုဒီပွဲကို ကျွန်တော်တို့ အနိုင်ရခဲ့ပါပြီ”ဟုလည်း ပြောကြားသွားသည်။
Soccer Myanmar
0 comments:
Post a Comment