ဒေါ့တ်မန်နှင့် စာချုပ်သက်တမ်း တိုးမြှင့်လိုက်သည့် ဂန်ဒိုဂန်
အိုင်ကေ ဂန်ဒိုဂန် အနေဖြင့် ဘိုရပ်ရှား ဒေါ့တ်မန်တွင်ပင် (၂၀၁၇)ထိ ဆက်ရှိနေမည့် စာချုပ်သစ်ကို လက်မှတ် ရေးထိုးလိုက်ကြောင်း သိရှိရသည်။
ဂျာမန်လက်ရွေးစင် ကွင်းလယ်ကစားသမားသည် ဒေါ့တ်မန်မှ သေချာပေါက် ထွက်ခွာမည်ဟု ကြေညာထားသော်လည်း ယခုအခါ ကလပ်အသင်းတွင်ပင် ဆက်နေရန် ဆုံးဖြတ်ချက် ပြောင်းလဲလိုက်ခြင်း ဖြစ်သည်။ ဒေါ့တ်မန်မှ ထွက်ခွာမည်ဟု ဂန်ဒိုဂန် ပြောကြားခဲ့သည့်နောက် မန်ချက်စတာ ယူနိုက်တက် အပါအဝင် ဥရောပ ကလပ်အသင်း အချို့က ၎င်းကို အလေးအနက် ချိတ်ဆက်ခဲ့သေးသည်။ ဂန်ဒိုဂန်က ဘွန်းဒစ်လီဂါ ပြိုင်ပွဲဝင် အသင်းနှင့် စာချုပ်သစ် ချုပ်ဆိုမှု သတင်းကို အတည်ပြုလိုက်ပြီး ယင်းအတွက် ဝမ်းမြောက်မိကြောင်း ပြောကြားခဲ့သည်။
“ရာသီကြို လေ့ကျင့်ရေး အစီအစဉ် ပထမနေ့တော့ ပြီးသွားပြီ။ နည်းပြအဖွဲ့ရယ်၊ အသင်းဖော်တွေရယ်နဲ့ အလုပ်လုပ်ရတာ ပျော်စရာပါ။ အခုဆို ကျွန်တော့် အနာဂတ်ကို တိတိကျကျ ရွေးချယ်ပြီးပါပြီ။ ဒေါ့တ်မန်မှာ ဆက်ကစားပါမယ်။ အခုလောလောဆယ်တော့ ရာသီသစ်အတွက် ကြိုတင်ပြင်ဆင်မှုတွေ အတွက်ပဲ ကျွန်တော် တိုက်ရိုက် အာရုံစူးစိုက်ထားမှာ ဖြစ်ပါတယ်”ဟု ဂန်ဒိုဂန်က ဆိုသည်။ ဒေါ့တ်မန်၏ အားကစား ဒါရိုက်တာ မိုက်ကယ်ဇော့ကမူ “ဂန်ဒိုဂန် ဒေါ့တ်မန်မှာ ဆက်ကစားမယ်ဆိုတာ သိရလို့ ကျွန်တော်တို့ ဝမ်းသာပါတယ်။ ဒေါ့တ်မန်ရဲ့ အားကစားကဏ္ဍ ရည်မှန်းချက်တွေ ပြည့်မြောက်ဖို့ ကြိုးစားရာမှာ သူဟာ အရေးပါတဲ့ အစိတ်အပိုင်းတစ်ခု ဖြစ်နေမယ်လို့ ကျွန်တော် ယုံကြည်ပါတယ်”ဟု မှတ်ချက်ပြုသွားသည်။
ဂန်ဒိုဂန်၏ စာချုပ်သည် (၂၀၁၆)တွင် သက်တမ်းကုန်မည် ဖြစ်သော်လည်း စာချုပ်သစ်အရ သက်တမ်းနောက်တစ်နှစ် တိုးသွားခြင်း ဖြစ်သည်။ ၎င်းသည် (၂၀၁၂)ခုနှစ်က ဒေါ့တ်မန်အသင်း ဘွန်းဒစ်လီဂါ ချန်ပီယံဆု ဆွတ်ခူးရာတွင် အဓိက နေရာမှ ပါဝင်ကစားခဲ့သူ တစ်ဦးဖြစ်သည်။
Soccer Myanmar
0 comments:
Post a Comment