ယူ-၂၃ အသင်း ကွင်းလယ်ကစားသမား လှိုင်းဘိုဘို ဒဏ်ရာမှ ပြန်လည်သက်သာ
Written by ရွှေဘုတ်
ရန်ကုန် (မဇ္ဈိမ)။ ။ စင်ကာပူ ဆီးဂိမ်းပြိုင်ပွဲအတွက် ရွေးချယ်ထားသည့် မြန်မာ့လက်ရွေးစင် ယူ-၂၃ အသင်းအဓိက ကွင်းလယ်ကစားသမား လှိုင်းဘိုဘိုသည် ယူ-၂၀ အသင်းနှင့် ခြေစမ်းပွဲတွင် ခြေကျင်းဝတ်ဒဏ်ရာ ရရှိခဲ့သော်လည်း ပြန်လည်ကောင်းမွန်လာပြီ ဖြစ်သည် ဟု မြန်မာ ယူ-၂၃ အသင်း မီဒီယာတာဝန်ခံ ကိုဇော်မင်းထိုက် က မဇ္ဈိမသို့ ပြောသည်။ လှိုင်းဘိုဘိုသည် ရတနာပုံ လူငယ်အသင်းမှ ထွက်ပေါ်လာသည့် ကစားသမား တစ်ဦးဖြစ်ပြီး အာရှယူ-၂၃ ချန်ပီယံရှစ် ခြေစစ်ပွဲတွင် အဓိက ကစားသမားအဖြစ် ပါဝင်ခဲ့ကာ အသင်းအတွက် နှစ်ဂိုး သွင်းယူပေးနိုင်ခဲ့သည်။
လှိုင်းဘိုဘို၏ ဒဏ်ရာအခြေအနေနှင့် ပတ်သက်၍ “လှိုင်းဘိုဘိုက ပြီးခဲ့တဲ့ ယူ-၂၀ အသင်းနဲ့ ခြေစမ်းပွဲမှာ ခြေကျင်းဝတ် ခိုက်မိတာပါ။ ဒဏ်ရာက မပြင်းထန်ပါဘူး။ ခုပြန်ကောင်းနေပါပြီ။ အသင်းနဲ့အတူ လေ့ကျင့်ခန်း ပြန်လုပ်နိုင်နေပါပြီ။ အသင်းကတော့ ထိုင်းမသွားခင် ဒီမှာ ကလပ်အသင်းတွေနဲ့ ခြေစမ်းပွဲတွေ ကစားဖို့ စီစဉ်ထားပါတယ်။ ဗီယက်နမ်နဲ့ ခြေစမ်းပွဲလည်း သွားကစားဖြစ်မှာပါ။ ဆီးဂိမ်းအတွက် အားလုံးက ကြိုးစားပြင်ဆင်နေပါတယ်” ဟု ကိုဇော်မင်းထိုက်က ပြောသည်။
မြန်မာ့လက်ရွေးစင် ယူ-၂၃ အသင်းသည် လက်ရှိတွင် ပဏာမကစားသမား ၂၃ ဦးဖြင့် လေ့ကျင့်ပြင်ဆင်လျက်ရှိပြီး ဂျပန်နိုင်ငံသို့ သွားရောက်လေ့ကျင့်ရန် ဂျပန် ဘောလုံးအဖွဲ့ချုပ်နှင့် ညှိနှိုင်းလျက်ရှိကာ မေလ ၂၂ ရက်တွင်လည်း ဗီယက်နမ်နိုင်ငံ ဟိုချီမင်းမြို့၌ ဗီယက်နမ် ယူ-၂၃ အသင်းနှင့် ခြေစမ်းပွဲကစားရန် စီစဉ်ထားသည်။
Mizzima
0 comments:
Post a Comment