ဂေါ့ဇီနှင့် ဂွန်ဒိုဂန် အလဲအထပ် ဖြစ်နိုင်ကြောင်း သတင်းများကို ဒေါ့တ်မန် အားကစားဒါရိုက်တာ ငြင်းဆို
အိုင်ကေး ဂွန်ဒိုဂန်ကို ဘိုင်ယန်မြူးနစ် အသင်း၏ မာရီယို ဂေါ့ဇီနှင့် အလဲအထပ် ပြုလုပ်မည်ဆိုသော သတင်းများအပေါ် ဘိုရပ်ရှားဒေါ့တ်မန် အသင်းက ငြင်းဆိုသွားခဲ့သည်။
ဒေါ့တ်မန် ကွင်းလယ်လူ ဂွန်ဒိုဂန်သည် (၂၀၁၆)ခုနှစ်၊ ဇွန်လတွင် အသင်းနှင့် စာချုပ်သက်တမ်း ကုန်ဆုံးမည်ဖြစ်ပြီး စာချုပ်သက်တမ်းတိုးရန် ကမ်းလှမ်းမှုကို ငြင်းဆိုထားသည်။ ထို့ကြောင့် ၎င်းသည် နွေရာသီတွင် ဒေါ့တ်မန်မှ ထွက်ခွာဖြစ်ရန် သေချာသလောက် ရှိနေပြီး မန်ချက်စတာ ယူနိုက်တက်က အလေးအနက် ချိတ်ဆက်နေသည်ဟု ယူဆရသည်။ ပြီးခဲ့သည့် ရက်ပိုင်းအတွင်း သတင်းအချို့က ဂျာမန်ချန်ပီယံ ဘိုင်ယန်သည် ဒေါ့တ်မန်ထံမှ ၎င်းတို့ ခေါ်ယူထားသည့် ဂေါ့ဇီကို ဂွန်ဒိုဂန်နှင့် အလဲအထပ် ပြုလုပ်ရန် ကမ်းလှမ်းခဲ့ကြောင်း ဖော်ပြလာခဲ့သည်။
ဂေါ့ဇီသည် (၂၀၁၃-၁၄)ရာသီတွင် ဘိုင်ယန်သို့ ပြောင်းရွှေ့ခဲ့သော်လည်း မျှော်လင့်ထားသလောက် အမြင့်ဆုံး စွမ်းဆောင်ရည်မျိုး မပြသနိုင်ဘဲ ရုန်းကန်နေရသည်။ ဒေါ့တ်မန် အားကစား ဒါရိုက်တာ မိုက်ကယ်ဇော့ကမူ ယင်းသတင်းများသည် အခြေအမြစ် မရှိဟု ငြင်းပယ်သွားသည်။ ၎င်းက ဒေါ့တ်မန်သို့ ဂေါ့ဇီ ပြန်လာရန်မှာ ဖြစ်နိုင်ခြေ နည်းလွန်းကြောင်းနှင့် ဘိုင်ယန်ဘက်က ဂွန်ဒိုဂန်အတွက် ချဉ်းကပ်မှုလည်း မပြုလုပ်ထားကြောင်း ဖြေရှင်း ပြောကြားခဲ့သည်။
ဇော့က “ဂွန်ဒိုဂန်နဲ့ ဂေါ့ဇီကို ကစားသမားချင်း လဲလှယ်ဖို့ ဟုတ်လား။ အခုအချိန်မှာ ဂေါ့ဇီက ဘိုင်ယန်ရဲ့ ကစားသမား တစ်ယောက်ပါ။ သူ့အနေနဲ့ ဒေါ့တ်မန်ကို ပြန်လာမယ်လို့ ကျွန်တော်တော့ လုံးဝ စိတ်ကူးယဉ်ကြည့်လို့ မရဘူး”ဟု ဆိုသည်။ ၎င်းက ဒေါ့တ်မန် အနေဖြင့် ဂွန်ဒိုဂန်ကို ဘိုင်ယန်က မခေါ်ယူနိုင်အောင် အတင်းအဓမ္ပ လိုက်လံပိတ်ပင်မှုမျိုး ပြုလုပ်နေမည် မဟုတ်ဟုလည်း ပြောကြားခဲ့သည်။ ဘိုင်ယန်သည် ဒေါ့တ်မန်၏ အဓိက ကစားသမားများဖြစ်သည့် ဂေါ့ဇီအပြင် တိုက်စစ်မှူး ရောဘတ် လီဝင်ဒေါစကီးကိုပါ ခေါ်ယူခဲ့ရာ ကလပ်အသင်း နှစ်ခုကြား ခါးသီးသော အတိတ်မျိုး ရှိနေခဲ့သည်။
ဇော့က “ဂွန်ဒိုဂန်ကို ဘိုင်ယန်က ခေါ်ရင်လည်း နောက်ထပ် စစ်ပွဲတစ်ခု ဖြစ်လာမှာ မဟုတ်ပါဘူး။ ဟုတ်ပါတယ်။ ဘွန်းဒစ်လီဂါ ပြိုင်ဘက် တစ်သင်းဆီကိုတော့ ကျွန်တော်တို့ ကစားသမားကို မရောင်းချင်ပါဘူး။ ဒီရာသီမှာ ဘိုင်ယန်ကို ကျွန်တော်တို့ မယှဉ်နိုင်ခဲ့ဘူး ဆိုရင်တောင် ဘိုင်ယန်ကို ကျွန်တော်တို့ ကစားသမားတွေ လက်လွှဲပေးရတာ မကြိုက်ပါဘူး။ ဒါပေမဲ့ လောလောဆယ် ဂွန်ဒိုဂန်အတွက် ဘာကမ်းလှမ်းမှုမှ မရှိသေးပါဘူး”ဟု ပြောဆိုသွားသည်။ အသက်(၂၄)နှစ်ရှိ ဂွန်ဒိုဂန်သည် ယခုရာသီ အသင်းအတွက် ဘွန်းဒစ်လီဂါ ပွဲပေါင်း(၂၀) ကစားပြီး (၃)ဂိုး သွင်းယူပေးခဲ့သည်။
Soccer Myanmar
0 comments:
Post a Comment