ကလပ်အသင်း အချို့နှင့် ချိတ်ဆက်ဆွေးနွေးနေဟု အက်သလက်တီကို ကွင်းလယ်လူ တူရန် အတည်ပြု

ကလပ်အသင်း အချို့နှင့် ချိတ်ဆက်ဆွေးနွေးနေဟု အက်သလက်တီကို ကွင်းလယ်လူ တူရန် အတည်ပြု

အက်သလက်တီကို မက်ဒရစ် ကွင်းလယ်လူ အာဒါတူရန်က ၎င်း၏ အေးဂျင့်သည် ကလပ်အသင်း အချို့နှင့် ဆွေးနွေးမှုများ ပြုလုပ်နေကြောင်း ထုတ်ဖော် ဝန်ခံလိုက်သည်။

၎င်း၏ Twitter စာမျက်နှာပေါ်တွင် တူရကီ လက်ရွေးစင် ကွင်းလယ်တိုက်စစ်သမားက မိမိ၏ အေးဂျင့်သည် ကလပ်အသင်း သုံးလေးခုနှင့် စကားပြောနေကြောင်း ထုတ်ဖော် ရေးသားခြင်းဖြင့် အက်သလက်တီကိုနှင့် အနာဂတ် မသေချာမှုကို ထင်ဟပ်စေခဲ့သည်။ အသက်(၂၈)နှစ်ရှိ ကစားသမားသည် ယခုနွေရာသီတွင် ဗင်းဆင့်ကယ်လ်ဒါရွန် ကွင်းကြီးကို စွန့်ခွာဖွယ် ရှိနေပြီး ချယ်လ်ဆီး၊ ဘာစီလိုနာ၊ မန်ချက်စတာ ယူနိုက်တက်နှင့် PSG အသင်းများက ၎င်းကို စိတ်ဝင်စားလျက် ရှိနေသည်။ တူရန်၏ စာချုပ်သည် (၂၀၁၇)ခုနှစ်ထိ သက်တမ်း ကျန်နေသေးသော်လည်း ကစားသမား ကိုယ်တိုင်ကမူ ပရီးမီးယားလိဂ်သို့ ပြောင်းရွှေ့ကစားရန် စိတ်ဆန္ဒ ရှိနေကြောင်း သတင်းများလည်း ထွ့်ပေါ်နေသည်။

တူရန်သည် ချယ်လ်ဆီး၊ ဘာစီလိုနာနှင့် ယူနိုက်တက်တို့အနက် တစ်သင်းသင်းကို ရွေးချယ်ဖွယ် ရှိနေပြီး လီဂူးဝမ်း ချန်ပီယံ PSGနှင့် အီတလီ စီးရီးအေကလပ် အေစီမီလန်တို့ကလည်း ကစားသမားကို ဆက်လက် ချိတ်ဆက်လျက် ရှိသည်။ “လောလောဆယ်တော့ ကျွန်တော့် အေးဂျင့်ဟာ ကလပ်အသင်း သုံးလေးခုလောက်နဲ့ အဆက်အသွယ် ရှိနေပါတယ်။ တကယ်လို့ သဘောတူညီမှု တစ်ခုခု ရှိလာမယ်ဆိုရင် ထပ်ပြီး အသိပေးပါ့မယ်”ဟု တူရန်က Twitterတွင် ရေးသားခဲ့သည်။ အက်သလက်တီကိုသည် ၎င်းတို့၏ ကစားသမားအတွက် ပြောင်းရွှေ့ကြေးကို ပေါင်စတာလင် (၂၅)သန်းမျှ သတ်မှတ်ထားသည်။

တူရန်သည် ဂါလာတာဆာရေးမှ အက်သလက်တီကိုသို့ ပြောင်းရွှေ့လာကာ (၄)ရာသီ ကစားပြီးနောက် ပရိသတ် အချစ်တော် ကစားသမားတစ်ဦး ဖြစ်လာသည်။ ၎င်းသည် (၂၀၁၄)ခုနှစ်တွင် အက်သလက်တီကိုအသင်း (၁၈)နှစ်အတွင်း ပထမဆုံးအကြိမ် လာလီဂါ ချန်ပီယံဆုကို ဆွတ်ခူးခဲ့ရာ၌လည်း အရေးအပါဆုံး ကစားသမား တစ်ဦးအနေဖြင့် ပါဝင်ခြေစွမ်းပြခဲ့သည်။

Soccer Myanmar