လာမည့်ရာသီ ချန်ပီယံဆုကို ယူနိုက်တက် စိန်ခေါ်နိုင်မည်ဟု ရွန်နီယုံကြည်
မန်ချက်စတာ ယူနိုက်တက် အနေဖြင့် လာမည့် ရာသီတွင် ပရီးမီးယားလိဂ် ချန်ပီယံဆုကို အမှန်တကယ် စိန်ခေါ်နိုင်စွမ်း ရှိလာစေမည်ဟု အသင်းခေါင်းဆောင် ဝိန်းရွန်နီက ပြောကြားလိုက်သည်။
မန်နေဂျာ ဒေးဗစ်မိုယက်စ် လက်ထက်တွင် စိတ်ပျက်ဖွယ် ဖြတ်သန်းမှုများ ကြုံခဲ့ပြီး အဆင့်(၇)ဖြင့် ရာသီသိမ်းခဲ့သည့်နောက် ယူနိုက်တက်သည် ပြီးခဲ့သည့် ရာသီကမူ လူးဝစ်ဗန်ဂါးလ်၏ ဦးဆောင် ကိုင်တွယ်မှုဖြင့် ချန်ပီယံလိဂ်ဝင်ခွင့် တစ်ကျော့ပြန် ရရှိလာခဲ့သည်။ ဗန်ဂါးလ် လက်ထက်တွင် အသင်းအနေဖြင့် ရလဒ်ပိုင်း မတည်ငြိမ်မှုများကြောင့် ချန်ပီယံ ဖြစ်ခွင့်နှင့် အလှမ်းဝေး ခဲ့သော်လည်း နောက်ပိုင်း ပွဲစဉ်များတွင် ဗန်ဂါးလ်၏ ဘောလုံးဒဿနှင့် ယူနိုက်တက် ကစားသမားများ အစပ်အဟပ် တည့်လာပြီး ထိပ်သီးပြိုင်ဘက်များကို အနိုင် ကစားနိုင်ခဲ့သည်။
ဗန်ဂါးလ်သည် အသင်းကို ပိုမိုတောင့်တင်းအောင် အားဖြည့်တည်ဆောက်ရန် စီစဉ်နေပြီး လတ်တလောတွင် နယ်သာလန် လက်ရွေးစင် တောင်ပံတိုက်စစ်သမား မမ်းဖစ်ဒီပေးကို ပေါင်စတာလင် (၂၅)သန်းဖြင့် ခေါ်ယူထားပြီး ဖြစ်သည်။ ရွန်နီက “နောက်ရာသီမှာ ကျွန်တော်တို့ဟာ ချန်ပီယံဆုကို စိန်ခေါ်နိုင်ဖို့ အလှမ်းမဝေးတော့ဘူးလို့ ရိုးရိုးသားသားပဲ ယုံကြည်ထားပါတယ်”ဟု ဆိုသည်။ ၎င်းက “ခင်ဗျားတို့ အနေနဲ့ ပထမဆုံး (၁၀)ပွဲ၊ (၁၁)ပွဲလောက်ကို ပြန်ကြည့်ရင် ကျွန်တော်တို့အသင်း (၁၃)မှတ်လောက်ပဲ ရတဲ့ထိ အခြေအနေ ဆိုးခဲ့တာကို မြင်ရလိမ့်မယ်။ လာမယ့်ရာသီမှာတော့ ပိုကောင်းတဲ့ အစပြုမှုမျိုး လုပ်ဆောင်နိုင်မယ်လို့ ထင်ပါတယ်။ အရေးကြီးတာက ကျွန်တော်ရော၊ မန်နေဂျာရော၊ တစ်သင်းလုံးရောက နောက်ထပ် ကစားသမားသစ် တချို့ကို ခေါ်ယူလိုက်ပြီးရင် ချန်ပီယံဆုအတွက် လက်တွေ့ စိန်ခေါ်လာနိုင်မယ်လို့ ယုံကြည်နေတာပါပဲ”ဟုလည်း မှတ်ချက်ပြုခဲ့သည်။
ရွန်နီက “ပွဲတွေ တော်တော်များများ ဖြစ်နိုင်သလောက် ဆက်တိုက် နိုင်နေခြင်းက သိပ်ကို ကျေနပ်စရာပါ။ ယူနိုက်တက်လို အဆင့်မျိုး အသင်းတစ်သင်းဟာ ဆုဖလားတွေ ဆွတ်ခူးရယူနေဖို့ ထိုက်တန်ပါတယ်။ လာမယ့်ရာသီမှာတော့ အခြေအနေတွကို မှန်မှန်ကန်ကန် ဖြစ်လာအောင် ကျွန်တော်တို့ လုပ်ပြနိုင်မယ် ထင်ပါတယ်”ဟုလည်း ပြောကြားသွားသည်။
Soccer Myanmar
0 comments:
Post a Comment