အာဆင်နယ်၏ ပစ်မှတ် ကစားသမား အားလုံးကို မန်ချက်စတာ ယူနိုက်တက် အလို ရှိနေကြောင်း ဝင်းဂါး ဝန်ခံ
နွေရာသီ အပြောင်းအရွှေ့တွင် မိမိ အသင်း၏ ပစ်မှတ် ကစားသမား အားလုံးကို ပရီးမီးယားလိဂ် ပြိုင်ဘက် မန်ချက်စတာ ယူနိုက်တက်က ငွေအလျှံပယ်သုံးပြီး ခေါ်ယူသွားမည်ကို စိုးရွံ့မိကြောင်း အာဆင်နယ် မန်နေဂျာ အာစင်ဝင်းဂါးက ဝန်ခံပြောကြားလိုက်သည်။
ယူနိုက်တက်သည် ယခုနှစ် ဘောလုံးရာသီ မတိုင်မီက အိန်ဂျယ်ဒီမာရီယာ၊ အန်ဒါဟာရဲရား၊ လုခ်ရှော၊ မာကို့စ်ရိုဟိုနှင့် ဒါလေဘလင်းတို့ကို ပြောင်းရွှေ့ကြေး ယူရို သန်း ၂၀၀ နီးပါးဖြင့် ခေါ်ယူခဲ့ပြီးနောက် လာမည့်နှစ် ဘောလုံးရာသီ အတွက် ပီအက်စ်ဗွီ ကွင်းလယ်တောင်ပံ ကစားသမား မမ်ဖစ်ဒီပေးကို ယူရို ၂၇.၅ သန်း ဖြင့် ခေါ်ယူနိုင်ခဲ့ကြောင်း ကြေညာခဲ့သည်။
ထို့နောက် ဝင်းဂါးက လူးဝစ်ဗန်ဂါးလ်၏ အသင်းသည် ပြီးခဲ့သည့် နွေရာသီ အပြောင်းအရွှေ့ကဲ့သို့ပင် ငွေကြေး အမြောက်အများ သုံးစွဲလိမ့်မည်ဟု ထင်မြင်ကြောင်း ဆိုခဲ့သည်။
“မန်ချက်စတာယူနိုက်တက် အနေနဲ့ အပြောင်းအရွှေ့ ဈေးကွက်မှာ သွက်သွက်လက်လက် လှုပ်ရှားလိမ့်မယ်လို့ ထင်ပါတယ်။ ကျွန်တော် ကစားသမား တစ်ယောက်ကို ကမ်းလှမ်း လိုက်တာနဲ့ မန်ချက်စတာ ယူနိုက်တက်က ပိုက်ဆံအထုပ်လိုက်ဆွဲပြီး ရောက်နေပါပြီ” ဟု ဝင်းဂါးက ပြောကြားခဲ့သည်။
လက်ရှိ ပရီးမီးယားလိဂ် အမှတ်ပေးဇယားတွင် မန်ချက်စတာယူနိုက်တက်ထက် နှစ်မှတ်အသာဖြင့် တတိယနေရာ၌ ရပ်တည်နေသည့် အာဆင်နယ်သည် တနင်္ဂနွေနေ့တွင် အိုးထရတ်ဖို့ဒ်၌ သွားရောက်ယှဉ်ပြိုင် ကစားရမည် ဖြစ်သည်။
ဗန်ဂါးလ်သည် အိုးထရတ်ဖို့ဒ် ခရီးအစတွင် အခက်အခဲများဖြင့် စတင်ခဲ့ရသော်လည်း ယခုအခါတွင် ချန်ပီယံလိဂ်ဝင်ခွင့် ပြန်လည်ရရှိခဲ့ပြီး နယ်သာလန် နည်းပြဟောင်းအနေဖြင့် ရာသီသစ်အတွက် နာမည်ကျော် ကစားသမားများကို ဆွဲဆောင်နိုင်လိမ့်မည်ဟု ယုံကြည်ကြောင်း ဝင်းဂါးက ပြောကြားသွားခဲ့သည်။
Soccer Myanmar
0 comments:
Post a Comment