လီဗာပူးလ် အနေဖြင့် ထိပ်တန်း တိုက်စစ်မှူးသစ် တစ်ဦး ခေါ်ယူသင့်ဟု ဂျရတ် အကြံပြု
လီဗာပူးလ် အနေဖြင့် လာမည့် ရာသီတွင် တိုက်စစ်မှူးသစ် တစ်ဦးကို ဦးစားပေး ဝယ်ယူရန် လိုအပ်ကြောင်း အသင်းခေါင်းဆောင် စတီဗင်ဂျရတ်က မှတ်ချက်ပြု ပြောကြားလိုက်သည်။
ချန်ပီယံလိဂ် ဝင်ခွင့်ကို ပြန်လည် ပိုင်ဆိုင်လိုပါက တစ်ရာသီလျှင် ဂိုးပေါင်း (၃၀)ဝန်းကျင်မျှ သွင်းယူနိုင်သည့် ထိပ်တန်း တိုက်စစ်မှူး တစ်ဦးကို လီဗာပူးလ် လိုအပ်လိမ့်မည်ဟု ဂျရတ်က ဆိုသည်။ လီဗာပူးလ်တွင် ဒန်နီရယ်လ် စတားရစ်ဂ်ျမှာ တစ်ရာသီလုံး ဒဏ်ရာများနှင့် ရုန်းကန်ခဲ့ရပြီး အေစီမီလန်ထံမှ ခေါ်ယူထားသည့် မာရီယို ဘာလော့တယ်လီမှာလည်း ဆိုးဆိုးရွားရွား ခြေစွမ်း ပျောက်ဆုံးနေခဲ့သည်။ ရာသီကုန်တွင် လီဗာပူးလ်မှ ထွက်ခွာတော့မည့် ဂျရတ်က အသင်းအနေဖြင့် ရေရှည်အတွက် စဉ်းစားပြီး ထိပ်တန်း တိုက်စစ်သမား တစ်ဦးကို ဝယ်ယူရန် လိုအပ်ကြောင်း အကြံပြုခဲ့သည်။
“ကျွန်တော်သာ ဆိုရင်တော့ ရေတိုဖြေရှင်းမှုကို စဉ်းစားပြီး ဘယ်လို ကစားသမား ဝယ်ယူမှုကိုမှ မလုပ်ချင်ပါဘူး။ ကျွန်တော်ကတော့ အသင်းကို ရောက်လာပြီး အောင်မြင်မှုအတွက် တိုက်ပွဲဝင်ဖို့ အဆင်သင့် နိုးကြားနေတဲ့ ကစားသမားမျိုးတွေကိုပဲ လိုချင်ပါတယ်”ဟု ဂျရတ်က ပြောကြားခဲ့သည်။ ၎င်းက “လူးဝစ်ဆွာရက်ဇ်ကို ဆုံးရှုံးခဲ့ရတဲ့ အခြေအနေက လီဗာပူးလ်အတွက် ခက်ခဲလွန်းပါတယ်။ တကယ်လို့သာ စတားရစ်ဂ်ျက ကြံ့ခိုင်မှု ပြည့်ဝနေမယ် ဆိုရင်တော့ လီဗာပူးလ်ဟာ ဒီရာသီ ထိပ်ဆုံးလေးသင်းမှာ ပါဝင်နိုင်မယ်လို့ ကျွန်တော် တကယ်ပဲ ယုံကြည်မိပါတယ်။ ထိပ်ဆုံးလေးသင်းမှာ ပါဖို့ဆိုရင် တစ်ရာသီကို (၂၅)ဂိုးကနေ ဂိုးပေါင်း(၃၀)လောက် ပုံမှန် သွင်းပေးမယ့် တိုက်စစ်မှူးတွေ လိုပါတယ်။ လီဗာပူးလ်ဟာ ဒီရာသီ အဲဒီ အပိုင်းမှာ တကယ့်ကို အားနည်းခဲ့တာ အမှန်ပါ” ဟုလည်း ဆိုသည်။
ဂျရတ်က “ကျွန်တော်က အသင်းပိုင်ရှင်တွေနဲ့ မန်နေဂျာကို အထွန့်တက်တာ မဟုတ်ပါဘူး။ ပရိသတ် တစ်ယောက် အနေနဲ့ ပြောနေတာသာ ဖြစ်ပါတယ်။ တကယ်လည်း ဒါက ကျွန်တော်တို့ လိုအပ်နေတဲ့ အပိုင်းပါ။ တကယ်လို့ ထိပ်တန်း တိုက်စစ်မှူးသစ် တစ်ဦးသာ ရလာပြီ ဆိုရင် လီဗာပူးလ်အတွက် လာမယ့်ရာသီက အများကြီး ပိုကောင်းလာနိုင်ပါတယ်”ဟုလည်း ပြောကြားသွားသည်။
Soccer Myanmar
0 comments:
Post a Comment