ဝုလ်ဖ်ဘာ့ဂ် ကွင်းလယ်လူ ဒီဘရုမ်းကို ခေါ်ယူရေး စတင်ချဉ်းကပ် စုံစမ်းနေသည့် မန်စီးတီး
မန်ချက်စတာ စီးတီးအနေဖြင့် ဝုလ်ဖ်ဘာ့ဂ်အသင်း ကွင်းလယ်ဖန်တီးရှင် ကီဗင်ဒီဘရုမ်းကို ခေါ်ယူရန် စုံစမ်း ချဉ်းကပ်မှုများ ပြုလုပ်နေကြောင်း သိရှိရသည်။
ချယ်လ်ဆီး အသင်းကို စွန့်ခွာကာ (၂၀၁၄)ခုနှစ်၊ ဇန်နဝါရီလက ဂျာမန်ကလပ်အသင်းသို့ ကူးပြောင်းသွားသည့် ဘယ်လ်ဂျီယံ လက်ရွေးစင်သည် ယခုအခါ ဘွန်းဒစ်လီဂါ၏ ခြေစွမ်း အထက်ဆုံး ကစားသမား တစ်ဦးအဖြစ် ရပ်တည်လျက် ရှိသည်။ ၎င်းသည် ယခုရာသီ ဝုလ်ဖ်ဘာ့ဂ်အတွက် (၁၇)ဂိုးထိ သွင်းယူပေးခဲ့သော်လည်း ယင်းထက်ပို၍ အသိအမှတ် ပြုသင့်သည့် အချက်မှာ ဘွန်းဒစ်လီဂါ ပြိုင်ပွဲ တစ်ရပ်တည်းတွင်ပင် အသင်းဖော်များအတွက် ဂိုးသွင်းယူရန် (၁၉)ကြိမ် ထောက်ပံ့ပေးထားခြင်း ဖြစ်သည်။
ထိုသို့သော အခြေအနေများကြောင့် ဂျာမန်ချန်ပီယံ ဘိုင်ယန်မြူးနစ်ကလည်း ဒီဘရုမ်းကို စိတ်ဝင်စားမှု ပြသနေသည်။ ဝုလ်ဖ်ဘာ့ဂ်သည် ၎င်းတို့ ဝယ်ယူစဉ်က ပေါင်စတာလင် (၁၈)သန်းသာ ပေးချေခဲ့ရသည့် ကစားသမားကို ပြန်လည် ရောင်းချချိန်တွင် ပေါင်စတာလင် သန်း(၄၀)မျှထိ တောင်းဆိုရန် လိုလားလျက် ရှိသည်။ မန်စီးတီးသည် ဒီဘရုမ်းအတွက် ချဉ်းကပ်မှုများ ပြုလုပ်ထားသော်လည်း ကမ်းလှမ်းမှုတစ်ရပ် အဆိုပြုခြင်းမျိုး မရှိသေးဟုလည်း သိရသည်။ မန်စီးတီး အနေဖြင့် ယခုရာသီ ပရီးမီးယားလိဂ် ချန်ပီယံဆုကို စောစီးစွာ လက်လွှတ်ခဲ့ရသည့် အခြေအနေကြောင့် အသင်းကို သွေးသစ်လောင်း ပြင်ဆင်ဖွဲ့စည်းသွားရန် အလေးအနက် စီစဉ်လျက်ရှိသည်။
Soccer Myanmar
0 comments:
Post a Comment