ဒေါ့မန်မှ နည်းပြ ကလော့ပ် ထွက်ခွာသွားချိန်တွင် ရုန်းကန် ရနိုင်ကြောင်း ကာဂါဝါ ဝန်ခံ
ဘိုရပ်ရှားဒေါ့တ်မန်မှ နည်းပြ ယာဂင်ကလော့ပ် ထွက်ခွာ သွားချိန်တွင် မိမိအနေဖြင့် ရုန်းကန် ရမည်ဟု မျှော်လင့်ထားကြောင်း ကွင်းလယ်လူ ရှင်ဂျီကာဂါဝါက ဖွင့်ဟ ဝန်ခံခဲ့သည်။
ကာဂါဝါသည် ဒေါ့တ်မန်မှတစ်ဆင့် မန်ချက်စတာ ယူနိုက်တက်သို့ ပြောင်းရွှေ့ခဲ့ပြီး ထို့နောက်တစ်ဖန် ယခုရာသီ အစောပိုင်းတွင် ဂျာမန်ကလပ်သို့ တစ်ကျော့ပြန် ရောက်ရှိလာခဲ့သည်။ အသက်(၂၆)နှစ်ရှိ ဂျပန် လက်ရွေးစင်က ဆစ်ဂ်နယ်လ် အီဒူနာ ကွင်းကြီးသို့ တစ်ကျော့ပြန် ခြေချရန် ဆုံးဖြတ်ခဲ့ခြင်းသည် ကလော့ပ်ကြောင့်ဟု ဆိုသည်။ ၎င်းက ရာသီကုန်တွင် ဒေါ့တ်မန်မှ ကလော့ပ် ထွက်ခွာသွားချိန်၌ မန်ချက်စတာ ယူနိုက်တက်မှ ဆာအဲလက်စ် ဖာဂူဆန် ထွက်ခွာသွားချိန်တွင် ဖြစ်ခဲ့သည့်အတိုင်း အဆိုးဘက်မှ သက်ရောက်မှုများ ဖြစ်လာမည်ကို စိုးရိမ်လျက် ရှိသည်။ ကလော့ပ်သည် ရာသီကုန်ထိသာ ဒေါ့တ်မန်ကို တာဝန်ယူမည်ဟု အတည်ပြုထားပြီး ဖြစ်သည်။
ကာဂါဝါက “နည်းပြသစ်တစ်ယောက် ရောက်လာပါလိမ့်မယ်။ ဒီအခြေအနေဟာ မန်ချက်စတာမှာ ကျွန်တော် ကြုံခဲ့တုန်းကလို အခက်အခဲတွေ ဖြစ်လာမှာကို စိုးရိမ်ရပါတယ်။ ဒါပေမဲ့ အရေးအကြီးဆုံးက ကစားသမားနဲ့ နည်းပြကြား အပြန်အလှန် ယုံကြည်ပြီး တူညီတဲ့ ရည်မှန်းချက်ဆီ ဦးတည် ချီတက်ဖို့ပါပဲ။ ကျွန်တော်တို့ အနေနဲ့ ရာသီသစ် မစခင် ကတည်းက အရမ်းကို ကြိုးစား အားထုတ်နေဖို့ လိုပါတယ်။ ကျွန်တော်တို့ လုပ်နိုင်တာလည်း ဒါပဲ ရှိတယ်။ ကျွန်တော်ကတော့ အတတ်နိုင်ဆုံး အကောင်းဆုံး ကြိုးစားသွားမှာပါ”ဟု ပြောကြားသွားသည်။
Soccer Myanmar
0 comments:
Post a Comment