ဆက်ခ်ျကို အသင်းမှ ထွက်ခွာရန် ချယ်လ်ဆီး ခွင့်ပြုကြောင်း အေးဂျင့်အတည်ပြု
ချယ်လ်ဆီးသည် ဝါရင့် ဂိုးသမားကြီး ပီတာဆက်ခ်ျကို အသင်းမှ ထွက်ခွာရန် ခွင့်ပြုချက် ပေးလိုက်ပြီဖြစ်ကြောင်း သိရှိရသည်။
စတမ်းဖို့ဒ်ဘရစ်ဂ်ျတွင် ဆယ်စုနှစ် တစ်ခုကျော် ကြာမြင့်အောင် အမှုတော် ထမ်းခဲ့သည့်နောက် အသက်(၃၂)နှစ်အရွယ် ချက်လက်ရွေးစင်သည် ရာသီကုန်တွင် ချယ်လ်ဆီးကို စွန့်ခွာတော့မည်ဟု အေးဂျင့်ဖြစ်သူက အတည်ပြု ပြောကြားခဲ့သည်။ ချယ်လ်ဆီးတွင် ဘယ်လ်ဂျီယံ လူငယ်လက်တက် ဂိုးသမားလေး သီဘောက်ကော်တွိုက်စ် လက်စွမ်းပြနေသည့်နောက် ယခုရာသီ တစ်လျှောက်လုံး ဆက်ခ်ျသည် ဒုတိယ ဦးစားပေး ဂိုးသမား အဆင့်ဖြင့်သာ ကျေနပ်ခဲ့ရသည်။ ချယ်လ်ဆီး မန်နေဂျာ ဟိုဆေးမော်ရင်ဟိုက အကောင်းဆုံး ဂိုးသမား နှစ်ဦးကို ဆက်လက် ထိန်းသိမ်းထားလိုသည်ဟု ပြောကြားခဲ့သော်လည်း ဆက်ခ်ျ ကိုယ်တိုင်ကမူ ပုံမှန်ပွဲထွက်ခွင့်ရမည့် အသင်းတစ်ခုသို့ ပြောင်းရွှေ့ရန် လိုလားနေသည်။
ယခုအခါ ချယ်လ်ဆီးဘက်က ဆက်ခ်ျအနေဖြင့် စိတ်တိုင်းကျ အသင်းပြောင်းရန် ခွင့်ပြုပေးလိုက်ပြီဟု ကစားသမား၏ အေးဂျင့်ဖြစ်သူ ဗစ်တာကိုလာက ပြောကြားခဲ့သည်။ “ဆက်ခ်ျဟာ ချယ်လ်ဆီးနဲ့ ခိုင်မာတဲ့ စာချုပ်ရှိနေတုန်းပါ။ ဒါပေမဲ့ သူ့ကို စိတ်ဝင်စားတဲ့ တခြားအသင်းတွေနဲ့ ဆွေးနွေးဖို့ ခွင့်ပြုချက် ရထားပြီ ဆိုတာကို ကျွန်တော် အတည်ပြုနိုင်ပါတယ်။ ပြီးတော့ ဆက်ခ်ျကိုယ်တိုင်ကလည်း ပုံမှန်ပွဲကစားခွင့်ရမယ့် အသင်းတစ်သင်းကို ပြောင်းရွှေ့ဖို့ စိတ်ဝင်စားနေကြောင်းပါ ကျွန်တော် ထပ်ပြီး အတည်ပြုပါတယ်”ဟု ၎င်းက ပြောဆိုသွားသည်။
ဆက်ခ်ျသည် ယခုရာသီတွင် ပရီးမီးယားလိဂ် (၅)ပွဲ အပါအဝင် စုစုပေါင်း (၁၄)ပွဲသာ ကစားခွင့် ရရှိခဲ့သည်။
Soccer Myanmar
0 comments:
Post a Comment