မြန်မာ ယူ-၂၀ အသင်း သြစတြေးလျတွင် ကာတာယူ-၂၀နှင့်ခြေစမ်းမည်
Written by ရွှေဘုတ်
နယူးဇီလန် ကမ္ဘာ့ဖလားပြိုင်ပွဲအတွက် သြစတြေးလျနိုင်ငံသို့ ရောက်ရှိလေ့ကျင့်နေသည့် မြန်မာ့လက်ရွေးစင် ယူ-၂၀ အသင်းနှင့်ကာတာ ယူ-၂၀ အသင်းတို့ သြစတြေးလျနိုင်ငံ ဆစ်ဒနီမြို့တွင် မေလ ၂၁ ရက်၌ ခြေစမ်းကစားရန် မြန်မာနိုင်ငံဘောလုံးအဖွဲ့ချုပ်မှ စီစဉ်လျက်ရှိသည်။ မြန်မာနိုင်ငံ ဘောလုံးအဖွဲ့ချုပ် ဥက္ကဋ္ဌနှင့် ကာတာ ဘောလုံးအဖွဲ့ချုပ် တာဝန်ရှိသူများ ဖုန်းဖြင့် ဆက်သွယ်မှုအရ ကာတာ ယူ၂၀ အသင်းကို မြန်မာ ယူ၂၀နှင့် ဆစ်ဒနီမြို့တွင် ခြေစမ်းရန် ကာတာအဖွဲ့ချုပ် ဘက်မှလည်း စီစဉ်သွားမည် ဖြစ်ကြောင်း ပြန်လည်အကြောင်းပြန်ခဲ့သည်။
စပိန်နည်းပြ ဆန်းချက်ဇ် တာဝန်ယူကိုင်တွယ်လျက်ရှိသော ကာတာ ယူ၂၀ အသင်းသည် မြန်မာနိုင်ငံတွင် ကျင်းပခဲ့သည့် အာရှ ယူ၁၉ ချန်ပီယံရှစ်ပြိုင်ပွဲတွင် ဗိုလ်စွဲထားသော အသင်းဖြစ်ပြီး စပိန်နာမည်ကျော် ကလပ်အသင်းများ ၊ ဂျာမနီနှင့် ဥရောပ ကလပ်အသင်းများ၏ လူငယ်အသင်းများတွင် ကစားနေသော ကစားသမားများ ပါဝင်သည်။
မြန်မာ ယူ-၂၀ အသင်းသည် ကာတာ ယူ-၂၀ နှင့် နောက်ဆုံးယှဉ်ပြိုင်ကစားခဲ့သည့် အာရှ ယူ၁၉ ချန်ပီယံရှစ် ၂၀၁၄ ဆီမီးဖိုင်နယ်တွင် ကာတာအသင်းက အချိန်ပို၌ သွင်းယူခဲ့သောဂိုးဖြင့် ပွဲအပြီးတွင် (၃-၂)ဖြင့် အနိုင်ရထားသည်။
မြန်မာ့လက်ရွေးစင် ယူ-၂၀ အသင်းသည် ပြီးခဲ့သည့် ဥရောပခြေစမ်းခရီးစဉ်တွင် ကမ္ဘာ့ဖလားပြိုင်ပွဲဝင် ဆာဘီးယား ယူ-၂၀ အသင်းနှင့် ခြေစမ်းပွဲတွင် (၆-၀) ဖြင့် ရှုံးနိမ့်ခဲ့သလို ဟန်ဂေရီ ယူ-၂၀ အသင်းကိုလည်း ခြေစမ်းပွဲ၌ (၃-၀) ဖြင့် ရှုံးနိမ့်ခဲ့သည်။ မြန်မာ ယူ-၂၀ အသင်းသည် နယူးဇီလန်ကမ္ဘာ့ဖလား အတွက် မေလ ၁၃ ရက် မှစတင်ပြီး သြစတြေးလျနိုင်ငံသို့ သွားရောက်ကာ လေ့ကျင့်မှုများပြုလုပ်လျက်ရှိကာ ထိုမှတဆင့် နယူးဇီလန်နိုင်ငံသို့ တိုက်ရိုက် သွားရောက်မည် ဖြစ်သည်။
Mizzima
0 comments:
Post a Comment