PFA တစ်နှစ်တာအကောင်းဆုံးဆုများ
Written by အောင်ငြိမ်းသွေး
(အင်္ဂလန်)။ ။ ပရော်ဖက်ရှင်နယ် ဘောလုံးသမားများအဖွဲ့ချုပ် PFA က ချီးမြှင့်သည့် တစ်နှစ်တာ အကောင်းဆုံး ဘောလုံးသမားဆုကို ချယ်လ်ဆီး ကွင်းလယ်တိုက်စစ် ကစားသမား အီဒင်ဟက်ဇက်က ရရှိသွားခဲ့သည်။
အသက် ၂၄ နှစ်အရွယ်ရှိ ဟက်ဇက်သည် ပရီးမီးယားလိဂ်ပွဲစဉ် ၃၃ ပွဲကစားပြီးချိန်တွင် ၁၃ ဂိုးသွင်းယူကာ ရှစ်ဂိုးဖန်တီးပေးနိုင်ခဲ့သည်။ ချယ်လ်ဆီးအသင်းကို ပရီးမီးယားလိဂ်အမှတ်ပေးဇယားထပ်ဆုံးတွင် ရပ်တည်နိုင်ရန်နှင့် ကက်ပီတယ်ဝမ်းဖလားဆွတ်ခူးနိုင်ရန် အကောင်းဆုံးခြေစွမ်းပြ ကစားနိုင်ခဲ့သူ ဖြစ်သည်။
ဟက်ဇက်ကို ပရီးမီးယားလိဂ်ပြိုင်ဘက်ဘောလုံးသမားများက မဲအများဆုံး ပေးခဲ့ကြခြင်းဖြစ်သည်။ ဟက်ဇက်သည် PFA အကောင်းဆုံးကစားသမားဆုကို ပြီးခဲ့သည့် တနင်္ဂနွေနေ့က လန်ဒန်ရှိ Grosvenor Hotel တွင် လက်ခံရယူခဲ့သည်။ ၎င်းသည် ပြီးခဲ့သည့် ရာသီကလည်း အကောင်းဆုံးလူငယ်ကစားသမားဆုကို ရရှိခဲ့သည်။
'ကျွန်တော်အရမ်းပျော်ပါတယ်။ တစ်နေ့မှာ အကောင်းဆုံး ဖြစ်လို့ အလိုရှိခဲ့တာပါ။ ဒီရာသီမှာ အကောင်းဆုံးကစားနိုင်ခဲ့ပါတယ်။ ချယ်လ်ဆီးအသင်းကစားတာလည်း အလွန်ကောင်းပါတယ်။ ဒီဆုက ကျွန်တော်နဲ့ ထိုက်တန်လားဆိုတာတော့ မသိပါဘူး။ ဒါပေမဲ့ ကျွန်တော့်အတွက်တော့ တကယ်ကောင်းပါတယ်။ ကစားသမားတွေက မဲပေးကြတာဖြစ်လို့ ပိုကောင်းပါတယ်။ သူတို့က ဘောလုံးအကြောင်းကို တကယ်သိတဲ့ သူတွေပါ' ဟု ဟက်ဇက်က ပြောသည်။
တစ်နှစ်တာလူငယ်အကောင်းဆုံးကစားသမားဆုကိုမူ စပါးအတွက် ခြေစွမ်းပြလျက်ရှိသည့် အင်္ဂလန် လူငယ် တိုက်စစ်ကစားသမား ဟယ်ရီကိန်းက ရရှိသွားခဲ့သည်။
လူငယ် အကောင်းဆုံး ဘောလုံးသမားဆု
အသက် ၂၁ နှစ်အရွယ်သာရှိသေးသည့် ဟယ်ရီကိန်းသည် ယခုရာသီတွင် စပါးအသင်းအတွက် ပြိုင်ပွဲပေါင်းစုံတွင် ဂိုး ၃၀ အထိသွင်းယူပြီး ခြေစွမ်းပြနိုင်ခဲ့သူဖြစ်သည်။ ကိန်းက ဆုရရှိခြင်းသည် အလွန်အံ့အားသင့်ဖွယ်ကောင်းကြောင်းနှင့် မိသားစုနှင့် ၎င်းအတွက် အလွန်ဂုဏ်ယူဖွယ်ရာကောင်းသည့် အခိုက်အတန့်ဖြစ်ကြောင်းဆိုသည်။ ထို့အပြင် ကိန်းက ထိုဆုမှ အစပဲ ရှိသေးပြီး နောက်ထပ်ဆုများစွာ လာဦးမည်ဟု ပြောသည်။
တစ်နှစ်တာ အကောင်းဆုံးအသင်း
တစ်နှစ်တာ အကောင်းဆုံးအသင်းကို ရွေးချယ်ခဲ့ရာတွင် ချယ်လ်ဆီးအသင်းမှ ကစားသမား ခြောက်ဦးအထိ ပါဝင်ခဲ့ပြီး မန်ယူ၊ ဆောက်သမ်တန်၊ အာဆင်နယ်၊ လီဗာပူးလ်နှင့် စပါးတို့မှ တစ်ဦးစီ ပါဝင်ခဲ့သည်။
တိုက်စစ်တွင် ဟယ်ရီကိန်းနှင့် ဒီယေဂိုကော်စတာ၊ ကွင်းလယ်တွင် ဟက်ဇက်၊ ကော်တင်ဟို၊ ဆန်းချက်ဇ်နှင့် မာတစ်၊ နောက်တန်းတွင် ဘာထရန်၊ ကာဟေးလ်၊ တယ်ရီနှင့် အိုင်ဗန်နိုဗစ်ခ်ျတို့ ရွေးချယ်ခံခဲ့ရပြီး ဂိုးသမားနေရာတွင် မန်ယူဂိုးသမား ဒီဂီယာ ရွေးချယ်ခံခဲ့ရသည်။
အထူးဆု
ယခုနှစ်ရာသီအကုန်တွင် မေဂျာလိဂ်သို့ ပြောင်းရွှေ့တော့မည့် လီဗာပူးလ်အသင်းခေါင်းဆောင် စတီဗင်ဂျရတ်နှင့် မန်စီးတီးတွင် ကစားနေသည့် ချယ်လ်ဆီး ကွင်းလယ်ကစားသမားဟောင်း ဖရန့်လမ်းပတ်တို့မှာ PFA Merit award ဟုဆိုသည့် အထူးဆုကို ပူးတွဲ ရရှိခဲ့သည်။
အသက် ၃၄ နှစ်အရွယ်ရှိဂျရတ်နှင့် အသက် ၃၆ နှစ်အရွယ်ရှိ လမ်းပတ်တို့ နှစ်ဦးပေါင်း အင်္ဂလန်အသင်းအတွက် ပွဲ ၂၂၀ ကစားပေးခဲ့ကြသည်။
အမျိုးသမီး အကောင်းဆုံး ဘောလုံးသမားဆု
တစ်နှစ်တာ အမျိုးသမီး အကောင်းဆုံး ဘောလုံးသမားဆုကို ချယ်လ်ဆီး အမျိုးသမီးအသင်းမှ ကွင်းလယ်ကစားသမား ဂျီဆိုယန်က ရရှိသွားခဲ့သည်။ အာဆင်နယ်အသင်းမှ လိရ်ှဝီလျံဆင်မှာ တစ်နှစ်တာလူငယ် အမျိုးသမီး အကောင်းဆုံး ဆုကို ရရှိသွားခဲ့သည်။
ရည်ညွှန်း - ဘီဘီစီ
Mizzima
0 comments:
Post a Comment