ဘာစီလိုနာ တိုက်စစ်သည် ရီးယဲလ်ထက် ပိုကောင်းကြောင်း နေမာ မှတ်ချက်ပြု
ဘာစီလိုနာ၏ တိုက်စစ်အင်အားသည် ခါးသီးပြိုင်ဘက် ရီးယဲလ်မက်ဒရစ်ထက် ပိုမိုသာလွန် ကောင်းမွန်ကြောင်း တိုက်စစ်မှူး နေမာက မှတ်ချက်ပြု ပြောကြားလိုက်သည်။
ဘာစီလိုနာတွင် ၎င်းနှင့်အတူ လူးဝစ်ဆွာရက်ဇ်၊ လီယွန်နယ် မက်ဆီတို့ ပူးပေါင်းဖွဲ့စည်းထားသည့် သုံးပွင့်ဆိုင် တိုက်စစ်အားသည် ရီးယဲလ်၏ ခရစ္စတီယာနို ရော်နယ်လ်ဒို၊ ကာရင်မ်ဘန်ဇီးမား၊ ဂါရတ်သ်ဘေးလ်တို့ထက် ပိုမိုထက်မြက်ကြောင်း ဘရာဇီးလ် လက်ရွေးစင်က BBCနှင့် အင်တာဗျူးတွင် ပြောဆိုသွားခြင်း ဖြစ်သည်။ ထို့အပြင် ၎င်းက ဘာစီလိုနာသည် ယခုရာသီ လာလီဂါ၊ ချန်ပီယံလိဂ်နှင့် ကိုပါဒယ်လ်ရေး ဆုဖလား သုံးလုံးစလုံးကို ရယူနိုင်မည်ဟု ယုံကြည်ကြောင်းလည်း ဆိုသည်။
နေမာက “ကျွန်တော်တို့ဟာ ဖလားသုံးလုံးစလုံး အရယူဖို့ မျှော်လင့်နိုင်လောက်တဲ့ အသင်းစုဖွဲ့မှုမျိုးကို ပိုင်ဆိုင်ထားပါတယ်”ဟု ဆိုသည်။ ဘာစီလိုနာသည် နည်းပြ ဂျိုးဆက် ပက်ပ် ဂွာဒီယိုလာလက်ထက် (၂၀၀၈-၀၉) ဘောလုံးရာသီက ယင်းကဲ့သို့ ဆုဖလား သုံးလုံးစလုံး သိမ်းကျုံး ဆွတ်ခူးနိုင်ခဲ့ဖူးသည်။ ဘာစီလိုနာနှင့် ရီးယဲလ်တို့၏ တိုက်စစ်အင်အားချင်း နှိုင်းယှဉ်ရန် တောင်းဆိုသည့်အခါ နေမာက “ကျွန်တော်ကတော့ ဘာစီလိုနာ ပိုသာတယ်လို့ ထင်ပါတယ်။ ဒါပေမဲ့ ကျွန်တော်တို့ အနေနဲ့ ကိုယ့်အသင်းနဲ့ ပတ်သက်ပြီးပဲ အာရုံစိုက်ရမှာပါ။ ပြိုင်ဘက်အကြောင်း တွေးမနေချင်ပါဘူး။ ကျွန်တော်တို့ဟာ ပြိုင်ဘက် ခံစစ်သမားတွေကို ထိခိုက်နာကျင်သွားအောင် အားထုတ်ရပါမယ်။ ဒီအတွက် ပိုပြီးတော့ နားလည်မှု ရှိလာအောင် ကြိုးစားရမယ်။ မက်ဆီနဲ့ ဆွာရက်ဇ်တို့ဟာ သိပ်ကို ထူးချွန်တဲ့ ကစားသမားတွေပါ”ဟု မှတ်ချက်ပြုခဲ့သည်။
၎င်းက “မက်ဆီဟာ ကမ္ဘာပေါ်မှာ အကောင်းဆုံး ကစားသမားမျိုးဖြစ်ပြီး ဆွာရက်ဇ်ကလည်း ဂိုးသွင်းစွမ်းရည် သိပ်ထက်မြက်ပါတယ်။ သူတို့နဲ့အတူ တွဲဖက်ကစားခွင့် ရတာက ဂုဏ်ယူစရာပါ။ သူတို့ဟာ တကယ်တော်တဲ့ ကစားသမားနှစ်ယောက် ဖြစ်ပါတယ်”ဟုလည်း ပြောကြားသွားသည်။
Soccer Myanmar
0 comments:
Post a Comment