ယုံကြည်မှု ထားရှိပေးခဲ့သည့် အတွက် ဝင်းဂါးကို ကျေးဇူးတင်ကြောင်း ဂီရော့ဒ်ဖွင့်ဟ
မိမိအပေါ် ယုံကြည်မှု အပြည့်အဝ ဆက်လက် ထားရှိကာ နေရာပေးခဲ့သည့်အတွက် မန်နေဂျာ အာစင်ဝင်းဂါးကို ကျေးဇူးတင်မိကြောင်း အာဆင်နယ် တိုက်စစ်မှူး အိုလီဗီရာ ဂီရော့ဒ်က ဖွင့်ဟ ပြောကြားခဲ့သည်။
ပြင်သစ် လက်ရွေးစင် ဂီရော့ဒ်သည် မိုနာကိုကို အရေးနိမ့်သည့် ချန်ပီယံလိဂ် ပွဲစဉ်တွင် အခွင့်အရေး အတော်များများကို လက်လွှတ် ဆုံးရှုံးခဲ့ရသည်။ သို့သော်လည်း ဝင်းဂါးက တနင်္ဂနွေနေ့တွင် အဲဗာတန်နှင့် ရင်ဆိုင်သည့် အိမ်ကွင်း ပရီးမီးယားလိဂ် ပွဲစဉ်၌ ဂီရော့ဒ်ကို ဆက်လက် နေရာပေး ပွဲထုတ်ခဲ့ပြီး ကစားသမားက အဖွင့်ဂိုး သွင်းယူကာ အာဆင်နယ်အသင်း (၂-၀)ဖြင့် အနိုင်ရရှိခဲ့သည်။ အမ်းမရိတ်စ်တွင် မိုနာကိုကို (၃-၁)ဖြင့် အရေးနိမ့်ခဲ့ရာ၌မူ ဂီရော့ဒ်သည် ပွဲချိန် တစ်နာရီခန့်တွင် လူစားလဲ ခံခဲ့ရသည်။
အဲဗာတန်နှင့် ပွဲတွင် ခြေစွမ်းပြနိုင်ခဲ့သည့်နောက် ဂီရော့ဒ်က “ဝင်းဂါးဟာ ကျွန်တော့်ကို ပြန်နိုးထနိုင်ကြောင်း သက်သေပြဖို့ အခွင့်အရေး ပေးခဲ့ပါတယ်။ ကျွန်တော့် အနေနဲ့ အဲဗာတန်နဲ့ပွဲမှာ ကောင်းကောင်း ကစားနိုင် ခဲ့ပါတယ်။ ဒီအတွက် မန်နေဂျာကို ကျေးဇူးတင်ရမှာပါ။ ကျွန်တော်တို့ အနေနဲ့ အခြေအနေတိုင်းမှာ အတူတကွ ဖြေရှင်းသွားရပါမယ်။ တစ်ဆင့်ချင်း၊ တစ်လှမ်းချင်း ရှေ့ဆက်ဖို့ လိုပါတယ်” ဟု ပြောကြားခဲ့သည်။ အဲဗာတန်နှင့်ပွဲတွင် အာဆင်နယ်အတွက် ဒုတိယဂိုးကို တိုမက်စ် ရိုဆစ်စကီးက သွင်းယူခဲ့ပြီး အသင်းအနေဖြင့် အမှတ်ပေးဇယား အဆင့်(၃) နေရာတွင် ဆက်လက် ရပ်တည်နိုင်ခဲ့သည်။
Soccer Myanmar
0 comments:
Post a Comment