ရော်နယ်လ်ဒင်ဟိုကို ခေါ်ယူနိုင်ရန် သေချာသလောက် ရှိနေဟု အန်ဂိုလာ ကလပ်အသင်းတစ်ခုဆို
ရော်နယ်လ်ဒင်ဟိုကို ခေါ်ယူနိုင်ရန် သေချာသလောက် ရှိနေကြောင်း အန်ဂိုလာ ကလပ်အသင်း တစ်ခုက အခိုင်အမာ ပြောကြားခဲ့သည်။
ကမ္ဘာ့အကောင်းဆုံး ဘောလုံးသမားဆုကို နှစ်ကြိမ် ရရှိဖူးသည့် ဘရာဇီးလ် လက်ရွေးစင် ကွင်းလယ် ဖန်တီးရှင်ဟောင်းကို ခေါ်ယူနိုင်မည်ဟု အန်ဂိုလာကလပ် ကာဘူစကော့ပ်က ဆိုသည်။ မက္ကစီကိုကလပ် ကွီရန်တာရိုနှင့် စာချုပ်ကို အပြီးသတ် ပယ်ဖျက်ရန် ရော်နယ်လ်ဒင်ဟို အနေဖြင့် ဦးစွာ လုပ်ဆောင်ရမည်ဖြစ်ပြီး ယင်းနောက်တွင် ရော်နယ်လ်ဒင်ဟိုကို စာချုပ်နိုင်မည်ဟု အန်ဂိုလာ ကလပ်အသင်းဘက်က ကြေညာထားသည်။ အခြား ကမ္ဘာ့အကောင်းဆုံး ဘောလုံးသမားဆုရှင်ဟောင်း ရီဗယ်လ်ဒိုသည်လည်း ကာဘူစကော့ပ်တွင် ကာလတို သွားရောက် ကစားဖူးသည်။
ရော်နယ်လ်ဒင်ဟိုသည် PSG၊ ဘာစီလိုနာနှင့် အေစီမီလန်တို့တွင် ကစားဖူးပြီး ဘာစီလိုနာတွင် ကစားသမားဘဝ အတောက်ပဆုံး ကာလများကို ဖြတ်သန်းခဲ့ဖူးသည်။ ကာဘူစကော့ပ်၏ ဥက္ကဋ္ဌ ဘန်တို ကန်ဂမ်ဘားက “တော်တော်လေး သေချာပါတယ်။ ကျွန်တော်တို့ ဆွေးနွေး ညှိနှိုင်းနေဆဲပါ။ ဒါပေမဲ့ ရော်နယ်လ်ဒင်ဟို အနေနဲ့ သူ့ရဲ့ စာချုပ်ကို ပထမဆုံး အပြီးသတ် ရှင်းလင်းဖို့ လိုပါတယ်။ အဲဒီနောက်မှာတော့ ဇွန်လလောက်မှာ ကျွန်တော်တို့ဆီ သူရောက်လာလိမ့်မယ်။ ခင်ဗျားတို့က ရော်နယ်လ်ဒင်ဟိုကို ကျွန်တော်တို့ ဘာကြောင့် လိုချင်သလဲ မေးလိမ့်မယ်။ ရှင်းပါတယ်။ အသင်းမှာ ကွာလတီ ကစားသမားကောင်းတွေ ရှိစေချင်တယ်လေ”ဟု ပြော ကြားခဲ့သည်။
အသက်(၃၄)နှစ် ရှိပြီဖြစ်သော ရော်နယ်လ်ဒင်ဟိုသည် ကွီရန်တာရိုနှင့် နွေရာသီက စာချုပ်ခဲ့ပြီး ပြိုင်ပွဲစုံ (၁၄)ပွဲတွင် (၃)ဂိုးသွင်းကာ ဂိုးဖန်တီးမှု (၂)ကြိမ် ပြုလုပ်ထားနိုင်ခဲ့သည်။
Soccer Myanmar
0 comments:
Post a Comment