ဘာစီလိုနာနှင့်ပွဲမှ နည်းစနစ်ပိုင်းအတွက် နောင်တရမည် မဟုတ်ကြောင်း ပယ်လီဂရီနီ ပြောကြား
အီတီဟတ်တွင် ဘာစီလိုနာကို ၂-၁ ဂိုးဖြင့် ရှုံးနိမ့်ခဲ့သည့်ပွဲမှ မန်ချက်စတာစီးတီး၏ နည်းစနစ်ပိုင်းအတွက် နောင်တရခြင်း မရှိကြောင်း မန်နျူရယ် ပယ်လီဂရီနီက ပြောကြားလိုက်သည်။
အဆိုပါ ချန်ပီယံလိဂ် ရှုံးထွက်ပွဲစဉ် ပထမအကျော့တွင် မန်စီးတီးသည် ၄-၄-၂ ကစားကွက်ဖြင့် ပွဲထွက်ခဲ့ပြီး ပထမပိုင်းတွင် ဘာစီလိုနာက ပွဲကို စိုးမိုးထားခဲ့ကာ လူးဝစ်ဆွာရက်ဇ်က နှစ်ဂိုး သွင်းယူခဲ့သည်။
သို့သော်လည်း မန်စီးတီးသည် ဒုတိယပိုင်းတွင် ကစားပုံ ပိုကောင်းလာခဲ့ပြီး ဆာဂျီယို အဂူရိုက ချေပဂိုး တစ်ဂိုး ပြန်လည်သွင်းယူခဲ့သည်။ ဘာစီလိုနာကမူ ပွဲပြီးခါနီး နာကျင်အချိန်ပိုတွင် ပင်နယ်တီ ရရှိခဲ့သော်လည်း လီယွန်နယ်မက်ဆီ၏ ကန်သွင်းချက်ကို ဂျိုးဟတ်က ကာကွယ်သွားခဲ့သည်။
အဆိုပါ ရလဒ်ကြောင့် လက်ရှိ ပရီးမီးယားလိဂ် ချန်ပီယံအသင်း အနေဖြင့် ချန်ပီယံလိဂ် ကွာတားဖိုင်နယ်သို့ တက်လှမ်းရန် ခက်ခဲသွားခဲ့သော်လည်း အသင်း၏ ပထမအကျော့ရလဒ်အတွက် ပျော်ရွှင်မိကြောင်း ပယ်လီဂရီနီက ဆိုခဲ့သည်။
“စီးတီးရဲ့ နည်းစနစ်ပိုင်းအတွက် နောင်တရနေမှာ မဟုတ်ပါဘူး။ ဒါဟာ ဘာစီလိုနာနဲ့ ရင်ဆိုင်ရမယ့် နည်းလမ်းပါပဲ။ ကျွန်တော်တို့က မတူညီတဲ့ ပွဲနှစ်ပွဲကို ကစားခဲ့ရတာပါ။ ပထမပိုင်းနဲ့ ဒုတိယပိုင်းက အတော့်ကို ကွာခြားခဲ့တာပါ။ ပထမဂိုး မပေးရခင်အထိက ပွဲက ပုံမှန်ပါပဲ။ အဲ့ဒီနောက်မှာတော့ ကျွန်တော်တို့က အရမ်းလွယ်တဲ့ ဂိုးတစ်ဂိုး ပေးလိုက်ရပါတယ်။ အဲ့ဒီနောက် ကျွန်တော်တို့ရဲ့ ကစားပုံ ဆိုးရွားသွားခဲ့ပါတယ်။ ဒုတိယပိုင်းမှာတော့ ပွဲမစခင်က ပြောခဲ့တဲ့အတိုင်း ကစားနိုင်ခဲ့ပါတယ်။ ဘာစီလိုနာနဲ့ ယှဉ်ပြိုင်ရတာက လွယ်ကူတဲ့ကိစ္စ မဟုတ်ပါဘူး။ ကျွန်တော်တို့က နှစ်ဂိုး ပေးလိုက်ရပေမယ့် တစ်ဂိုး ပြန်သွင်းနိုင်ခဲ့ပါတယ်။ နောက်ပြီး ဂိုးသွင်းနိုင်မယ့် အခွင့်အရေး နှစ်ကြိမ် သုံးကြိမ်လောက် ရရှိခဲ့ပါတယ်။ အိမ်ကွင်းမှာ ၂-၁ နဲ့ ရှုံးတာက ရလဒ်ကောင်း မဟုတ်ပါဘူး။ ဒါပေမဲ့ ဒုတိယအကျော့မှာ အကောင်းဆုံး လုပ်နိုင်ဖို့ ကျွန်တော်တို့ ကြိုးပမ်းသွားမှာပါ။ ဂျိုးဟတ်ရဲ့ ပင်နယ်တီ ကာကွယ်မှုက အရမ်းကို အရေးပါခဲ့ပါတယ်။ ၃-၁ ဂိုးဆိုတဲ့ ရလဒ်က အင်မတန်ကို ခက်ခဲသွားနိုင်ပါတယ်” ဟု ပယ်လီဂရီနီက ပြောကြားသွားခဲ့သည်။
Soccer Myanmar
0 comments:
Post a Comment